DEPORTES, CULTURA E TURISMO

Dentro das actividades culturais o concello vén organizando anualmente unha variada programación na que se inclúen teatro, música, folklore, charlas, maxia, humor..., ó abeiro de convenios suscritos con outras administracións.

Como complemento ás actividades descritas, a Asociación Cultural "O Picato", organiza, tamén anualmente, outras no ámbito municipal, entre as que cabe destacar a Cabalgata de Reis, Os Carnavais, a Semana Cultural e o Magosto. Conta asimesmo con grupo de gaitas e baile rexional.

Outras actividades formativas e lúdicas lévanas a cabo a Asociación de Mulleres Rurais "Marco da Pena Verde" e a de Pensionistas e Xubilados - UDP- "Santa María de Trabada" dentro dos seus respectivos colectivos.

Polo que respecta ó deporte contamos coas escolas deportivas municipais, dándolle ós distintos colectivos a oportunidade de practicar variadas disciplinas deportivas, (fútbol, fútbol sala, baloncesto, tenis, ximnasia de mantemento, aeróbic, atletismo ...).

O pavillón de deportes dispón dunhas modernas instalacións nas que non falta un ximnasio totalmente equipado, incluída unha sauna.

Remodelación importante levouse a cabo recentemente nas piscinas municipais e no campo de fútbol, o que tivo unha moi favorable acollida por parte da cidadanía.

Con todo, dentro do deporte municipal, o seu buque insignia é desde a súa fundación no ano 1997 o equipo de fútbol sala "Concello de Trabada F.S.". Campión provincial na tempada 1997-1998, campión liga autonómica tempada 1999-2000. Representou a Galicia no campeonato de España de Autonomías. Militou na liga nacional e na actual tempada disputa a liga autonómica.

Dentro da segunda quincena do mes de agosto organízase o "Memorial Celso Currás" de fútbol sala na capitalidade municipal, en recordo e como recoñecemento a unha das persoas máis ilustres e preclaras na historia deste concello. Este torneo, chamado a ser un referente a nivel nacional na época estival, contou este ano, entre outros, con equipos da talla deportiva do Caja Segovia, Ram León, Azkar Lugo e Burela-Pescados Rubén.